الغيرة و الحب الاعمى

مع اول خيط ضوّ عينيا تحلو و تبع خيط الضو الاذان ...ريحة القهوة العربي الي تفوح من الزناقي ...قطاطس الرماد تتكسل معايا ..صوت القباقب و الصابوات ...ريحة العطر ..ابيض السفساري بازق السنڨري ...لكلها قامت اتدب و ماشية تكلت على ايامها مدام العزاب راقدين و هوايتهم البطالة، وكيما يقول هاك المثل اخدم هالتاعس على الراڨد الناعس ..كملت السراط متاعي مخلي هاك المدينة في حالها العادي ...السراط ماشي و يضواق و السخانة ماشية و تزيد و جاية من بعيد اسواط تتضاحك لون السماء تبدل احمر و العباد حوايجها ماشيا و تخف ، حسيت روحي قريب من جهنم، على هزة راسي الفوق نلقى بلاكة مكتوب عليها ...مدينة "الغيرة" ترحب بكم ...و انا ماشي في كل نهج زوز يتعاركو، كان مش برشا يتعاركو ... ريحة الكذب تفوح، وما تسمع كان الغورة و الفكان و الضرب و المضروب ...الودع ما يعجبش قدمت لقدام نلقى راجل كبير قاعد على كرسي و يتفرج قعدت بحذاه و بالطبيعة سالتو كيفاش لكلها تتعارك و هو قاعد ...قلي انا كنت كيفهم و مبعد الي كنت نتعارك معاها و نعارك عليها فدت مني و هجت و لكلهم باش يوليو كيفي يا وليدي الغيرة بلوة و نارها تحرقك قبل ما تحرق الي تحبو و بعد ترصيلك وحدك، يا وليدي الزيادة منها مرض و نقصانها و مرض و نحنا بني آدم ما نعرفو نشدو الوسط كان في الكياسات و انت وليدي ضاهر فيك مش متع الشي هذا افصع خير ما يعديوك ...سمعت كلام السيد و هزيت روحي و فصعت و انا خارج حسيت النفس تبدل و الهوى برد ...شديت الثنية ومعادش فاهم باش بش نطيح المرات الجاية

مقدم مزروب فماش ما هالسراط يوفى و نرتاح ندعثر في حاجة ما عرفتهاش شنوا جيت مكبوب على وجهي، على هزت عيني بعد الترهويجة متع الطيحة نلقى مكتوب في القع على قد ترهيجتك على قد ما تحبها جيت باش نهز راسي تضربت في حاجة طلعت بلاكة مكتوب فيها هذي ضربة باش تفيق على وضعك و انا مرهوج بالطيحة و السطعة نلقى بلاكة قدامي مكتوب فيها "الحب الاعمى" و انا مقدم نتفرج نلقى ناس مسكرينلهم عينيهم و تدعثر في بعضها و اتطيح و تعاود تقوم و جماعة اغرين تلمس في بعضها عالعمياني و واحد بعصابة يجري في جرة وحدة اخرى عينيها ماهيش مغمضة ... فهمت علاش التركيبة الي تكركبتها و البلاكة الي سطعت فيها راسي ...هزيت روحي وانا نضحك بالدموع على الشي الي ريتو و كملت الثنية ...اما لازم حاجة تفزدلك الجو ... هزيت راسي و ريت الوحش ... اي الوحش الي حكاولي عليه ...لشنوا يشبه ؟!!