التصعليك

الناس كيف يقلولهم يا صعاليك يكرزو و يفدو و ما تعجبهمش ...

وانا امنية حياتي نعيش صعلوك، نخدم النهار في سوق شيال، في الشوارع زبال، صانع نجار، الفرنك بعرقو ...

على فمي كان الكلام الطيب في نهارك زين في نهارك دڨلة و حليب في نهارك اسعد الايام في صباح الورد يا ورد و صباح الياسمين يا فلة ...

في الله يبارك و الله المستعان و يفضلك و يباركلك ...

الفم و الصباط يضحكو ..

يطيح الليل نكركر جراتلي و نتركز في خمارة ...

نسمع حديث الناس و نقيد الاحول ...

نضحك مع الي يضحكو ...

لين تشيخ الجلغة و في زيد الشيحة و بڨلة ليها ...

و يا سكران يا سكران صحة لفمك العطشان ...

والزوز صوردي الي جابهم الصباح مديهم الليل ...

نكمل سكرتي و نخرج نخيط النهوجات نهج نهج ...

و ننقص الماء في الزناقي ...

و نحكي مع قطاطس الخرب ...

لين نلقى روحي تحت شباكها ...

الي نعقلو من ريحة الصديد الي فيه ...

عندهم مديدة لتالي دهنوه طلعت الشباك من ضحكتها ...

نفرش كرضونة و نتفكر اول مرة ريتها ...

السفساري الحرير يلمع لعان و خلخال بو رطلين فوق الحنة، حمير و غبير خفاف بالسيف يتشافو ... الشفرة تذبح و العيون العسلي الي ليها نركع و نصلي و التبسيمة الي تذوب و الخدود التفاحي الي زادو في جراحي ... تتمختر في السوق تقول تضرب بڨادومة في عروڨ ڨلبي ... تمشي حفيانة على ڨبري ...

الدلال و الفيانة و الريح الطيبة ...

مشيتها بالرنة ... زلزال يرعش بدني مع كل حطة ساق ...

و انا تحت هاك الشباك نقعد نتمتم في غنايتها الي تحبهم مالفجعة تحل الشباك و اطل تقول شكون يخنس حسي من خوفي عليها و من خوفي لا تراني و الا يراوني ...

نبات نقرالها في ما كتبو الصعاليك في الجاهلية من قبلي و نكتبلها الي في ڨلبي واجعني و الحنين الي كل ليلة تحت شباكها يرجعني ...

نعيش صعلوك تحت شباكها و ما شاهد علينا كان نداء الليالي و قطر الدهن الي على حيطها و صديد شباكها ...

و ما شاهد عليا كن كلامي و تصاورها في منامي ...

صعولك لا تعرفو لا عمرها شافتو ...

وهو عايش من شوفتها في السر و ضحكتها من وراء البرسيان الي ما يوري كان خيالها