زعمة نبيع ؟

و انا مكمل طريقي في السراط الي ماشي و يولي يتعب من الكم الهائل من الذكريات الي قاعدة اتطير فوق راسي و من الخوف الي ركبني كيف نشوف وجوه العباد الي في الثنية تعرضني حاجة ضاوية و الناس عليها بالصف مكتوب عليها عيادة نيسان للمعالجة بالبيلسان، مشيت في في وسط الصفوف نسال شفما هوني علاش الصف هذا الكل تلفت واحد هازز قلبو في يدو وقلي هوني تنسى وجايع القلب و ترجع مولود جديد، الدكتور جبران الي يداوي كل واحد جونحو بالحب تكسرت.

تفكرت وقتها الي انا قطعتلها وعد بش ما نحبش بعدها خرجت مالصف و ندهت خاتر حياتي لكل متعلم الي النسيان ضيف كالحب ياتي فجاة تفكرت الي الحب ثورة وما فماش ما خير من الثورة و بما انو جبد البيلسان تفكرت الثورة الشعبية بلبنان تفكرت زادة الي آخر السراط ثورة، الي آخر السراط خروج عن الحاكم الطاغي، الي آخر السراط حرية اما مش للناس الكل على خاتر اغلب الماشين على السراط "شيوخ" ضعاف الارادة، قلبهم كبير و يحبو يعبيو قفة الزوالي اما الزوالي يحب يعبي قفتو باديه و بالماكلة مش بالاحلامو تفكرت الي الحب و الاحلام غذاء الروح "تارك الاحلام ميّت" ... تفكرت الي الزوالي حلم برشا و كان يلقى يبيع احلامو للناس الي ما تحلمش ولا مزالت كيف بدات تحلم تتحقق، و تفكرت الي فما ناس خبرة في الركوب على الاحلاموانا نتفكر و شادد ثنيتي تفكرت نيسان (افريل) وقتها اختارو النهار 22 باش نبدا منو السراط الي مشاوني عليه و الي بديت نرقع فيه ملي عمري 14 عام بالتمرد على اختياراتهم لمجرد التمرد وقت لا اب صديق و لا صديق اب و اب الاب موجودينما فما كان انسانة وحدة عنات التمرد متاعي و مزالت تعاني كل يوم المرة هذي نلقى دار على جنب صغيرة و هادية عندي احساس الي هيا مهجورة مكتوب عليها دار النسيان بالكبيرو مكتوب تحتها بالصغير "هنا النسيان الذي يرحل اليه الجميع"برا ماهو من كثر ما نساوني قلت برا نعمل طلة نلقاهمش هوني نفرغ الي في قلبي و نخرج وانما بحيث نلقاها معبية بعباد ساكته و فمهمت مبعد السكات من شنوا ..عباد وجوها مفسخة بدونات بركة و الوجه الكل جلدة لا عيون لا فم لا شي ملامحهم لكل مفسخة ...نلقى ورقة مكتوب عليها "اذا اخترت النسان فانت اخترت فسخ ملامحك"

...لا جعلني لا نسيت خليني هكا و الوجايع تڨطع فيا من داخل خير من الي نولي مسلوخ من طينتي ...تاريخي الي صنع من وسيم هذا و الي تعبت عليه باش كونتو مش ليوم باش نجي نفسخو ...برا خرجت و بديت نفهم في اللعبة يا تعيش موجوع و تستحمل يا تعيش بلاش هوية ...ما صدقتش عينيا في السراط الي فما شكون يبيع في الدخان، مشيت نجري و يا خيبة المسعى طلع دخان اما زادة هو مش لله طلع مع كل كمية تخرجها من صدرك يخرجل تصويرة ...

مشيت نجرب في سيڨارو وما خرج من صدري كان اسمها السيد قعد متعجب قلي لازم تصويرتها تخرج تلفت و قتلو " يا دخلا اضلع صدري حتى صوريتك لن تقدر عن الخروج" ضحك و قلي ديما بكلامك انت هات شكون يغلبك ...كملت الثنية و انا شايخ على اسها كيف يلعب بيه الريح كيما كنت انا في خيالي نلعب بشعرها و نخطف بسرقة بوسة من شفايفها ...وصلت لبلاصة بدى الخيط يزيد يوساع و مكتوب فيها "هنا يقاس عيار الحب" ...تفكرت اسم الوحش "حب" الي حكاولي عليه مالاول ..قلت بالكش هوني يقيسو شجاعتك في مواجهت الوحش ...

انا دخلت و نسمع في واحد يعيط اهوآآآآآآ اهوآآآآآآ اهوآآآآآآآآقمت نعيط مالفجعة شبيك يا سي ز** قالي السيد الي وراء الكونطوار هذاكا نهضاوي شاريه بعشرين دينار بش كل ما يدخل واحد يفيقني مالنوم ..قتلو شتعملو هوني بالضبط ؟مدلي شكارة تقول تاست كحول نفخت نفخت نشوف في الشي اضفر مذهب طالع في الشكارة قلي كمل انفخ كمل و هو يضحل و يقول هاو منجم انت زيد انفخ زيد و هو شايخ بعد ما تهد حيلي ومعادش انجم ننفخ هز الشكارة و بدا يدندن حبك كم عيارو حارقني بمرارو  ... شاورت الصايغية ما عرفو مقدارو ... كم عياروووو كم عياروووو كم عياروووو ...ومبعد قلي الي نفختو هذاكا ذهب خالص كيف حبك الخالص ... للناس الي دايرين بيك ... لاهلك ... لبلادك ...انا نقلك ..ايا تبيعو ؟؟!!

(زعمة نبيع ؟)