البحر في مفهوم الانسان الفنان هو السكينة و الهدوء و الانقلابات و التشقلبات الانعكاسية و الشروق و الغروب و قضيب سنجاب فوق السحاب ...اما في سراطي انا ما عندو حتى علاقة بالرومنسية الرقمية و بصبلي دينار آ حبي ...
البحر مالاخر في عرفنا هو الموت ...تبدى حكاية البحر في قهوة القصب في احد الاحياء الشعبية، اول كلمة في الحديث خفف حملك و وين باش نڨونو ...الخيط هذا سيڨورو ولا ما يوصلش، شمشا السوم و منين نخرجو ...في انصاف الليالي الرجال تتسرسب تبتبت على حوال البحر، تڨون لين يركح و يركح البلانصي و يركح مولى البلانصي ...الي قتلتو البطالة و يحب يشوف حل، الي مڨطع من حكم، الي حاطط في مخو الجنة ...مانيش انا باش نحكيلكم على الحرقة و اسبابها لكلكم تعرفو ...البحر بلاعة مش كان للحراقة ...ا
ما زادة للبحار الزوالي ...للعوام الي خانتو ساقيه ...بلاعة لبرشا احلام حبت تكبر ...في سراطي وانا ماشي عرضني ميناء صغير و كمشة فلايك صغيرة زرقة و حمرة و بيضة باساميها الي على نسواين البلاد تسمات ... محبوبة ، بية، عيشة و سعات شاذلية ...
الشباك و الكركارة في كل تركينة حبل خشين بلاح بالشمس مربوط بحجرة ...زويز بحارة و كعيبات كودية على الصقالة يجسو في البحر ...رديون يخرخش يستناو في النشرة البحرية في الاذاعة الوطنية ...نهارتها الحال برد و هاك الغناية متع الخمسة متع الصباح في الاذاعة الوطنية ... الي تفكرك باش تلبس مليح ..."الدنيا برد ... الدنيا برد ... عم سعيد بيسقي الورد" ...
الشمس مزالت كيف طلت حاشمة تعطي في شويا ضو ازرق على اخضر في بلار قهوة البرط ...وين كنت قاعد مع شويا بحارة ...الرجال بعد تصبيحة في القهوة و بعد مالموجة عدات ليلتين و صبحية تتكسر على الشقوفات الي مطيشة تستنى باش يهدى الموج و يطلع الحوت لفوق شويا و يشد في الطعم ...
شويا شيطانة على شويا كانوليكا و شويا بابت خبز ...لكلها لابسة الزي الرسمي ... دنقري ازرق ماشي و يبياض كبوس احمر صوف شتوي ... صندال بلاستيك على ساقين مشققين من الملح و صوابع ايدين بين الحلة و الحلة حلة من خياطة الشباك ...صاشي كحلة فيها ما يدفي في الشتاء في عرض البحر ...
الڨاميلا و شويا ماكلة عالاغلب مدبشة كذابي (محمصة بالخضرة و الفول و العدس) ... تتسمى كذابي خاطر ما فيهاش لحم ... شكون يخلط عليه هالايمات ؟!التبسيمة هي هي حتى كان الڨاجو لصفر فارغ ...و الرجال تنبر على غلة بعضها ...يتعدى النهار بين الضحكة و الحسرة على فلان الي كلاه البحر هاك العام ...
بين التنهيدة و كلمة "آش رملت نساوين ها لزرڨ " ...يتعدى النهار و خوه و الحال هو الحال ...الڨاجو فارغ و الڨلب معبي ...نهار يسترزقو و عشرة ياكلو من رزق هاك النهار ...وكيف تسأ آش لزهم على الصنعة يقلك غرام البحر مصيبة ...و البحر كيف براد علاء الدين كان طلعلك الجني يتحلك باب العرش ...وكان طلع البراد فارغ هوكا طيب فيه التاي ...
البحر ماهوش رومنسي لهاك الدرجة ... البحر بالوعة و ما يتمنش و ما تمنوش حتى على سرك ما تعرفش وقتاش يتڨرعو و يفضحك !!
Aucun commentaire:
Enregistrer un commentaire