كرهتك و كفرت بيك

كرهت ريحة الدخان الي شادة في شعري و ريحة قطرات البيرة الي هاربة من شفايفي و لصقة بمريولي الي بلو عرق نهار خدمة في كرسي مكسر ...

كرهت بعدك في لحظة الي نستحقك تاقف بجنبي و تتحمل هبالي و تنرفيزي و كلامي المرزي كيما تحملت هبالك و بكاك ليالي ..

كرهت الشوارع الي كلها زبل و قطاطس جواعة و ريحة الشياط في كل باب بلاص و النصب الي تسكر عليك المادة  ...

كرهت نشوف التصاور و كرهت نشد مصورة نصور ..

كرهت نكتب على الي نحبها و كرهت نكتب على تمنيت نبات جنبها ..

كرهت اول كلمة كتبتها في هينيها و آخر كلما وشوشتها في وذنيها ...

كرهت اول شاهد على حبنا و آخر شاهد كيف تفرقنا ...

كرهت ندوة الصباح و قهوتي الكحلة و سواڨري و صوت فيروز في رديون بالترونزيستور ...

كرهت الحبار كيف يهبط سايل من ورقة تبلت بدومعي مش بدموعها ...

كرهت تصويرتك كيف تجيني عقاب الليل باش اتطلعلي السخانة و تهرب عليا النوم ..

كرهت هبالي و هبالك و هبالنا ببعضنا ...

كرهت الريحة متع ريحتك و كفرت بيها ...

كفرت بالنهار الي حلفت نتدفن في ترابك و النهار الي حبيت فيه عبادك ...

كفرت بالحب و انواعو ...

كفرت بالرفق بالقوانين و حقوق الحيوان ...

كفر برعشتي كيف يقولولي راك مش لباس ...

كفر بلحظة تمنيت نغفى على يد الي نحبها و باش تحبني تحت شجرة من شجراتك ...

بعد ما حبيت هذا الكل و فكيتهولي ما بقالي كان نقلب الحب كره و كفر .. فيك و بيك !