ريتوه منضري ؟ انساوه !

اي نعملهم و نعملهم اكثر ماللازم ...

كيما نحب كل شي مڨدي في قعداتي، كيما نحب كل شي مڨدي في علاقاتي مع العباد !

ستانست بكل شي مزين و مبرقش ... ستانست بالالوان !

ستانست بكل شي واضح قدامي و نعرف بلاصتو، اي لازم كل شي في بلاصتو كيما الكلام ...

اما سعات نفلت، بشر لحم و دم مش طرف لوح، نعرف الي انا ساعات نطلع ابرد منها اما هذا لا يمنع انكم ما تحترموش انفعالاتي ...

ولا خاترني سكوتي كيف نترفز ما تجدش عليكم ؟

ولا خاترني ما نوريش الي انا مكرز كيف نكرز يولي العيب مني ؟

برا يا سيدي باش نكونو واضحين انا مكرز من برشا عباد المدة هاذي و قررت باش ندخل في مرحلة انتقالية كاسحة شويا و باش تشوفو مني تصرفات شنيعة عالاخر !

وانا متاكد الي التصرفات الجديدة مش باش تعجب حتى حد ... عادي خاتر مستانس نعطيكم اكثر من حقكم و انا شطر حقي مش ماخذو معاكم !

الي باش يحس روحو ياكل في البخس و ما ينجمش يكمل معايا جملة من غير ما يصر باش يعرف لواش ... اما هذا شيستحق ...

الي باش يحس روحو يحكي وحدو ... يا يكمل يحكي وحدو يا يسكت ما عندوش حل آخر ...

الي باش يقدر الي نحسو يقدر و الي ما عينوش من غير تنوفيق و لوغة مضروبة متع الضروف يهز روحو و يمشي بالساكتة ...

الي يستحق باش نعمل مجهوف على خاطرو باش نقعدو صحاب و حباب مانيش باش ندخر ادنى مجهود ...

والي باش يقعدو في نطاق المعرفة السطحية راهو انا نحب هكاك و من غير ما يجتهد برشا باش نوليو صحبة ...

الي باش يوجعني باش نوجعو بقدر وجيعتو ومن غير مزية ...

والي يعمل خشم و يكبر خشمو يعرف وين يحطو ما عادش عندي وقت باش نثبت شبيه ...

لا عاد باش نسال على احوال الي ما سالش على حوالي ولا باش نتوحش الي ما توحشنيش ....

باش نولي نعمل روحي ما نراكمش حتى كيف تعرضوني في الشارع و من غير ما تجيو تسلمو باش تتصدمو عالاخر :)

والي باش يجيبها يصبر و يقول فترة تو تعدى ينحيها من مخو الحكاية ...

باش نرجع كيما قالو البعض متعجرف و حڨار و متملق 

باش نرجع نعاشر الحيوط الخايخة و قطاطس الخرب و البيران المڨملة و دخاني ...

مجتمع مريض ما يتعاش كان هاك !!