في العلم فما آلاف تسكر كل يوم من غير ما تقول راهو الشراب باهي و الشراب يهيج درا قداش من حاجة و مشاعر و احاسيس، فما آلاف تسكر باش تدفى خاتر تعيش في الشوارع و ما عندهاش حل آخر بخلاف الشراب هذا كان خلطو عليه كان ماشبوش كحول الوقود الي تسمى عندنا تزبريط و معدتو و صدرو و كل قطعة في بدنو تتخرب مع كل قطرة
في العالم زادة فما ناس تصبح مثمولة و باشمة بالماكلة نهار 1 جانفي و فما ناس تقوم تلوج في الزبل في الفضلة متع الناس لخرين باش تاكل هيا و توكل صغارها، فما ناس اخرين تصبح تمسح و تسيق في الرداد متع الناس الي ما تشدش روحها و تسكر و تبلبزها
في العالم فما ناس يعيشو في الجبولات ما يعرفوش نحنا في اناهو عام من اصلو ولا شنوا حتى اسمها البلاد الي عايشين فيها
فما ناس تسهر اطيب في الدجاج و الڨاطوات ليالي قبل راس العام و هو ما يلحقش باش يشري الحاجات هذيكا
فما ناس ما تعرفش الانترنات الي انا قاعد نكتب فيها عليهم من اصلو
وفما ناس ما يهمهاش الي نكتب فيه و ناس كيف تقرى تقول انا آش يهمني وآش مكلفني
وفما ناس تسخف اما ما بيديها شي تعملو
كيما في العالم فما ناس عندها 3 سنين تكركر في الحروبات وراها و الاف موتى
الناس الي تكتب على حياتها المغبونة و هو قدامو كعبة وسكي و باكو دخان اجنبي و راكش في الدفاء و باقي يوصف في حياتو بالمغبونة من المسحسن يسكر فمو و يقعد يسكر بينو وبين روحو و يخمم الي هو فما آلاف غيرو مش لاقين شوليقة ادفيهم في بردهم ولا سقف يلمهم ولا ماء نظيف يشربوه ولا وين يطيرو ماهم كيف الناس
فما ناص تبيع في الدبابز ب200 فنرك الكيلو باش ينجمو يشريو طرف خبز بايت يقسموه مع الهوايش الي مربينهم باش يستقاتو منهم حليب و لحم هذا كان خلطو على هايشة
من غير نفخ متع الخمرة و الشعر خاتر قبل العاطفة الجياشة الي تحكي بيها على الشرب عندك واجب انساني و اسهل حاجة تنجم تعملها تشوف قداش من جار عندك بايت بلاش عشاء (بما انو في حومتي مزال شكون يبات بلاش عشاء) تو تضم فمك الى ابد الآبدين ومعادش تنفخهملنا بحكاية حياتك المغبونة :)
